Хойд Америкийн Үндэсний Хоккейн лигийн 104 дэхь улирал коронавирусын цар тахлын улмаас хойшлогдсоор ердийн үеийнхээс 3 сарын дараа эхэлж байна.
АНУ-д Ковид-19 дэгдэлт их мөн өнгөрсөн улирал дуусаад удаагүй байгаа тул NHL-н шинэ улиралд зарим нэг өөрчлөлт орсон.
Шинэ улиралд нийт 31 баг 4 бүст хуваагдаж, өмнө нь улиралд 82 тоглолт хийдэг байсан бол энэ жил 56 тоглолт хийнэ.
Өмнөх улирлын “Стэнлийн цом”-ын плэйоффын тоглолтууд Эдмонтон болон Торонто хотод явагдаж дууссан.
Харин энэ улирал баг тус бүр 56 тоглолт хийх тул баббл-д байрлах нь тохиромжтой шийдвэр биш гэж үзсэн. Мөн NHL-н тоглогчид ч нэг дор байрлахыг хүлээн зөвшөөрөөгүй.
Түүнчлэн NHL-н 7 баг байрладаг Канад улс олон нийтийн эрүүл мэндийн асуудал Ковид-19-ийн улмаас АНУ-руу нэвтрэхгүй байх шийдвэрээ цуцлаагүй тул тус 7 багийг нэг бүст хуваарилж үлдсэн 24 багийг 3 бүс болгон өөрчилсөн юм.
1923 оноос хойш анх удаа Канадын 7 баг нэг бүсэд өрсөлдөхөөс гадна зарим ривал өрсөлдөгчид бие биенээсээ холдож байгаа нь харамсалтай.
| Хойд бүс | Зүүн бүс | Төв бүс | Баруун бүс |
|---|---|---|---|
| Калгари Флэймс | Бостон Бруйнс | Каролина Хуррикэнс | Анахэйм Дакс |
| Эдмонтон Ойлэрс | Буффало Сабрэс | Чикаго Блакхоукс | Аризона Коёотэс |
| Монтреал Канадиэнс | Нью Жерси Дэвилс | Колумбус Блу Жакэтс | Колорадо Аваланшэ |
| Оттава Сенаторс | Нью Йорк Айландэрс | Даллас Старс | Лос Анжелес Кингс |
| Торонто Мапл Лифс | Нью Йорк Рэйнжэрс | Дэтройт Рэд Вингс | Миннесота Вайлд |
| Ванкувэр Канакс | Филадльфиа Флайэрс | Флорида Пантэрс | Сан Хосэ Шаркс |
| Виннипэг Жэтс | Питсбург Пингвинс | Нэшвил Предаторс | Ст.Луйс Блүс |
| Вашингтон Капиталс | Тампа Бэй Лайтнинг | Вегас Голдэн Найтс |
Улирлын тоглолтууд нэгдүгээр сарын 13-наас тавдугаар сарын 8-ны хооронд явагдаж, плэйофф 11-нд эхлэн шигшээ цувралд 7 тоглолт гарвал долоодугаар сарын 9-нд “Стэнлийн цом”-н эзэд тодорсон байхаар 2020-21 оны улирал хуваарь гарсан.
Мөн Ковид-19 холбоотойгоор эрүүл мэнд аюулгүй байдлын шинэ журмуудыг баталсан байна. Жишээ нь тоглогчды шинжилгээний хариу эерэг гарсан тохиолдолд тоглуулахгүй. Эдгэрээд ирсэн тогхиолдолд багийн эмч болон зүрх судасны эмч зөвшөөрч байж талбайд гарах. Вирусын халдвар авсан тоглогчтой хавьталд орсон ч шинжилгээний хариу сөрөг, ямар нэгэн зовиур байхгүй бол тусгаарлалтанд орохгүй байж болох, багийн туслах дасгалжуулагчид амны хаалт заавал зүүх зэрэг дүрмүүд багтсан байна.
Бэлтгэсэн: Г.Дарханбаяр