ХОВД 6:0 ХАНТЕРС 

Лигийн эхлэлийг тун чамбай хийгээд байсан “Хантерс” энэ долоо хоногт “Ховд” 6.0-ээр бут ниргүүллээ. 

Энэ үдэшийн тод гялалзсан тоглогч нь “Хараацай” клубээс төрөн гарч дээд лигийн тамирчин болсон Г.Буяннэмэх байв. Авьяаслаг залуу тоглогч энэ тоглолтод гурван гоол оруулж, дээд лиг дэх анхны “Хеттрик”-ээ бүртгүүллээ. 

“Ховд” клубийн Япон тоглогч Ёшиока Рен хоёр гоол оруулсан бол П.Энхбилэг 11 метрийн торгуулийн цохилтоос гоол оруулж, баг нь 6:0-ээр хожсон юм. Тийнхүү “Ховд” клуб долоон оноотой болж долоо дугаар байрт дэвшлээ. 

ТӨВ АЗАРГАНУУД 1:11 УЛААНБААТАР 

Энэ долоо хоногт хэд хэдэн онцлох зүйл болсоны нэг нь “Төв Азарганууд” 2024-2025 оны улиралын анхны гоолоо оруулсан явдал зүй ёсоор тооцогдоно.

 Хэдийгээр олон гоолын зөрүүгээр хожигдож байгаа ч лигийн анхны гоолыг хэн, хэзээ оруулах вэ? гэсэн асуулт үүсээд байсаад. Уг асуултын хариулт нь Мексик тоглогч Кортез Онофре Жерардо байлаа.

“Улаанбаатар” клубийн 11 гоолыг Ота Шион /14’, 45+1’/, Г.Бат-Оргил/41, 80’/, У.Тэмүлэн/53’, 78’/, Э.Өнөр-Эрдэнэ/32’/, А.Дөлгөөн/42’/, Н.Сайнбуян/68’/, Д.Энзо/75’/, А.Дашням /83’/ нар оруулав. 

Хуудасны улмаас энэ тоглолтыг өнжсөн О.Мижиддорж, Б.Додгүү нарын торгууль үүгээр дуусаж, дараа долоо хоногт “Хоромхон”-ы эсрэг эргэн ирэх сайхан мэдээтэй байна. 

ЭРЧИМ 4:1 БРЕРА ИЛЧ 

Улиралыг өнгөтэй эхлүүлж, тэргүүн байрын төлөө хүчтэй өрсөлдөөн үзүүлэхээ сайн тоглолтуудаараа харуулж байгаа “Эрчим” энэ долоо хоногт “Брера Илч”-ийг 4:1-ээр хожлоо. 

Тоглолтын эхний гоолыг “Брера Илч”-ийг хамгаалагч Эрдэнэсүрэнгийн Мөнх-Эрдэнэ 25 орчим метрээс хүчтэй цохилтоор оруулав. Гэсэн ч энэ ганган гоолоос төд удалгүй “Эрчим”-ийн шуургалсан довтолгоонууд амжилттай болж эхэлсэн. 

Тоши Макимото 25’, Г.Төгөлдөр 29’, Хирояа 42’ нар “Брера Илч”-ийг хаалганы торыг хөдөлгөж эхний үед “Эрчим” 3:1-ээр илүүрхэв. Лигийн мэргэн буучдын жагсаалтыг тэргүүлж буй Коү Готоү 86 дахь минутад энэ тоглолтын эцсийн цэгийг тавьсан. 

ДЭРЭН 1:2 ХАНГАРЬД 

Олон жил Орхон аймгийнхаа нэрийг өндөрт өргөж яваа “Хангарьд” энэ долоо хоногт хүснэгтийг тэргүүлэгч “Дэрэн” 2:1-ээр хожиж хөгжөөн дэмжигчдээ дахин нэг удаа баярлууллаа. 

“Хангарьд” клубийн зүүн жигүүрийн хамгаалагч И.Жорже хаалгачийг хэмжиж цохиод, чамин нэгэн гоол оруулж багтаа 57 дахь минутад тэргүүллийг авчирсан. 

Овжин, мэдрэмжтэй байдалаа өөрийн давуу талаа болгон тоглодог Заяатын Тэмүүлэн багтаа 11 метрийн торгуулийн цохилт авчирч, Комура Юта амжилттай гүйцэтгэснээр 83 дахь минутад “Хангарьд” 0:2-оор тэргүүлээд эхлэв. 

Эцсийн мөч хүртэл зогсолтгүй зүтгэж, олон тоглолтод эерэг үр дүн авч байсан “Дэрэн” 87 дахь минутад Фунами Ютарогийн гоолоор тоог ойртуулсан ч үлдсэн хугацаанд дахиж гоол харсангүй. 

Тэргүүлэгчид оноо алдсан ч “Эрчим”-тэй адил 16 оноотой гоолын зөрүүгээр дээр нь бичигдэж байна. 

ХОРОМХОН 0:8 СП ФАЛКОНС 

Энэ тоглолтод 10-р сарын 04-нд 19:15 цагаас МХБХ-ны талбайд болох байсан ч цахилгаан тасарсаны улмаас хойшлоод байв. 

Хойшилсон тоглолтыг 10-р сарын 08-нд Яармаг дахь талбайд явуулахад “СП Фалконс” 0:8-аар илүүрхэж хожлоо. “Хоромхон”-ы хашир туршлагатай довтлогч Н.Наранболд өмнөх тоглолтод улаан хуудас авсан учир “СП Фалконс”-ын эсрэг тоглоогүй. 

Андрей Феррера, М.Батхишиг, Б.Намсрай нар хоёр, С.Отгонцагаан, М.Жансерик нар тус тус нэг гоол оруулав. 

Аваргын цомыг хамгаалагч “СП Фалконс” улиралын дөрөв дэх хожлоо авсан бол “Бишрэлт Хоромхон” есөн оноотой зургаадугаар байрт бичигдсэн хэвээр үлдлээ.