СП ФАЛКОНС 3:1 ХАНГАРЬД 

Лигийг тааруухан эхлүүлсэн “СП Фалконс” нэгдүгээр тойргийн төгсгөлийг сайн хийж зургаан тоглолт дараалан хожин, хүснэгтийг тэргүүлж байна. 

Аваргууд энэ удаад өнгөрсөн жилийн мөнгөн медальт “Хангарьд”-ыг 3:1-ээр хожиж, хөгжөөн дэмжигчиддээ бэлэг барилаа. 

“СП Фалконс”-ыг гоолуудыг багийн ахлагч М.Төгөлдөр болон Бразил легионерууд болох Андрей Феррера, Владимир Эвэртон нар хийлээ. Харин “Хангарьд”-аас Ц.Билгүүн багийнхаа гоолыг оруулсан. 

Азийн тэмцээнд орохын өмнө лигийн аваргууд өөрсдийн тоглолтоо олж, 21 оноотой нэгдүгээр тойргийг өнгөтэй дуусгалаа.

Орхон аймгийн нэр төрийг хамгаалагч “Хангарьд” клуб 15 оноотой хүснэгтийн дөрөвдүгээр байрт бичигдэж хаварын тойргийн тоглолтуудаа эхлүүлэхээр боллоо. 

ХОВД 3:3 ЭРЧИМ 

Том багуудын эсрэг харилцан гоолтой, ширүүн өрсөлдөөнтэй тоглолтыг үзүүлж байгаа “Ховд” ес дэх долоо хоногийн өрсөлдөгч “Эрчим”-тэй 3:3-аар тэнцлээ. 

Лигийг тэргүүлж байсан “Эрчим”-ээс Б.Ган-Эрдэнэ, Коү Готоү, Г.Билгүүн нар эхний хагаст гоол оруулж, 0:3-ээр итгэл төгс нэгдүгээр үеийг өндөрлүүлсэн. 

“Ховд”-ын залуус хоёрдугаар үеийг эрч хүчтэй эхлүүлж Ц.Сүх-Эрдэнэ, С.Өсөхбаяр, Ёшиока Рен нар гоёмсог гоолуудыг оруулан, 67 дахь минут гэхэд тоо 3:3 болон тэнцсэн юм. 

Үлдсэн хугацаанд аль аль баг том боломжууд үүсгэсэн ч амжилттай болгож чадалгүй тоглолт эвийн гэрээгээр өндөрлөлөө. 

ХОРОМХОН 1:2 ХАНТЕРС 

Дээд лигт анх удаа дэвшин тоглож буй “Хантерс”-ийг одоо шинэ цэрэг гэж хэлэхээргүй болж ээ. Учир нь тэд лигийн эхний тойргийн есөн тоглолтоос гурван хожил, хоёр тэнцээ авч 11 оноо цуглуулж чадлаа. 

Залуу бүрэлдэхүүнтэй “Хоромхон” өнгөрсөн долоо хоногт “Улаанбаатар”-ыг буулган авсан тул тэднээс оноо салгана гэдэг амаргүй даалгавар байв. Гэвч Ч.Мөнхбат дасгалжуулагчийн баг энэ даалгавартаа сайн бэлдэж ээ. 

Эхний хагасын 36 дахь минутад Э.Мөнгөнбагана гоол оруулж, “Хантерс” тэргүүлээд эхэлсэн. Хариуг нь Н.Наранболд 69 дэх минутад барьж, тоог тэнцүүлэв. “Хоромхон” цаашлаад хожих ч боломжтой нөхцөл байдал үүсээд байх эгзэгтэй үед багийн чухал хамгаалагч Д.Төрбат хоёр дахь шар хуудасаа авч талбайг чөлөөллөө. 

Хүн дутуу баг хамгаалалтдаа алдаа гаргасны “Хантерс”-ынхан уучилсангүй, 90+3 дээр М.Бямбасүрэн гурван онооны үнэтэй гоолыг шигтгэлээ. 

ТӨВ АЗАРГАНУУД 1:20 БРЕРА ИЛЧ 

Гадаа талбай цасаар хучигдсан ч “Төв Азарганууд”, “Брера Илч” багуудын тоглолтод “гоолын бороо” зутгаж “Брера Илч” 1:20-иор өрсөлдөгчөө илүүрхэлээ. 

Дархан-Уул аймгаас төрөн гарсан залуу тоглогч А.Содмөнх уг тоглолтод долоон гоолыг өөрийн нэр дээр бүртгүүллээ. 

“Брера Илч”-ийн хожил гэхээсээ илүү “Төв Азарганууд”-ын хожигдол олон статистек дагуулж буй. “Төв Азарганууд” есөн тоглолтод 112 гоол алдаж, хоёр гоол оруулсан үзүүлэлтэй лигийн эхний тойргийн өндөрлүүлж байна. 

ДЭРЭН 2:0 УЛААНБААТАР 

Тус хоёр багийн энэ тоглолт 2024 оны 10-р сарын 20-нд болох ёстой байсан ч цэнгэлдэхийн цахилгаан тасарсаны улмаас тодорхойгүй хугацаагаар хойшлогдоод байсан юм. 

Тийнхүү таван сар орчим хүлээсний эцэст 3-р сарын 09-нд “Дэрэн”, “Улаанбаатар” багуудын тоглолт 0:0 гэсэн үр дүнгээр, шинээр эхэллээ.

Дээр дурдсан цахилгааны асуудал үүсэхээс өмнө тоглолт 20 дахь минут хүртэл үргэлжилж, “Улаанбаатар” нэг гоол оруулж, мөн багийн хамгаалагч А.Дашням улаан хуудас аваад байсан. 

Тэмцээний журмын дагуу хойшлогдсон тоглолт гурван өдөрийн дотор нөхөж явагдаагүй тул тоглолт дахин шинээр эхэлсэн нь энэ юм. 

“Улаанбаатар” багийн хаалгач, хамгаалагчдын үл ойлголцолыг Япон тоглогч Фунами Юутаро шийтгэж, “Дэрэн” 1:0-ээр тэргүүлээд эхэлсэн. Лигийн хүчирхэг багуудын нэг “Улаанбаатар” үр дүнг тэнцүүлэхийн төлөө хэд хэдэн аюултай довтолгоо зохион байгуулсан ч амжилттай болгож чадсангүй. 

Эсрэгээрээ “Дэрэн” өрсөлдөгчийнхөө урагш шахсаныг ашиглаж, сөрөг довтолгоогоор гоол оруулж 88 дахь минутад тооны харьцааг 2-0 болгов. Гоолын эзэн нь өнөөх л Фунами Юутаро байлаа. 

Хожил авсан “Дэрэн” 19 оноотой хүснэгтийн гуравт, “Улаанбаатар” тавдугаар байрт бичигдэж байна. Энэ тоглолтод хоёр гоол оруулсан Фунами Юутаро нийт 16 гоолтой болж нутаг нэгт Коү Готоүгийн хамтаар мэргэн буучдын жагсаалтыг тэргүүлж буй. 

Үндэсний дээд лигийн хоёрдугаар тойргийн тоглолтууд 3-р сарын 14-өөс эхлэх хуваарьтай байна.