Хасын Хүлэгүүд баг Монголын сагсан бөмбөгийн спортын түүхэнд шинэ хуудас нээж, Зүүн Азийн Супер Лигт (EASL) шалгарсан анхны Монгол баг боллоо. Тус баг нь Монголын үндэсний дээд лигийн тэмцээнд 9 дэх удаагаа аваргын цом хүртэж буй нь энэ юм.

Энэ оны эхээр Зүүн Азийн Супер Лиг МСБХ-той урт хугацааны хамтын ажиллагааны гэрээ байгуулж, тус тэмцээний аварга багийг 2025–2026 онд EASL-д шууд оролцох эрхтэй болгосон. Ийнхүү Хасын Хүлэгүүд баг олон улсад Монгол улсынхаа нэрийг төлөөлөх эрхийг анх удаа авч байна.

Монголын Сагсан Бөмбөгийн Холбооны ерөнхий нарийн бичгийн дарга С.Төгжаргал хэлэхдээ:
“Хасын Хүлэгүүд баг нь 2024-2025 оны улиралд аварга болж, Зүүн Азийн Супер Лигт шалгарсан нь Монголын сагсан бөмбөгийн түүхэн шинэ түүх болж байна. Энэхүү боломж нь МСБХ болон баг тамирчид, дасгалжуулагчид, сагсан бөмбөг сонирхогчдын тууштай хөдөлмөр, хичээл зүтгэлийг илтгэж байна. Бид Хасын Хүлэгүүд багийг Ази тивийн лигийн аварга шилдэг багуудтай өрсөлдөж, Монголын сагсан бөмбөгийн нэрийг өндөрт гаргахыг тэсэн ядан хүлээж байна” гэж хэллээ.