Өнгөрсөн бямба гаригт “FIFA eWorld Cup” буюу гар тоглоомны ДАШТ Лондон хотод боллоо. Уг тэмцээний ялагчаар Саудын Арабын тоглогч Мосаад Алдоссари шалгарч, 250 мянган “ногоон”-ы эзэн болсон юм.

“Msdossary” нэрийн дор уг тэмцээнд оролцсон М.Алдоссари шигшээд Бельгийн Стефано “StefanoPinna” Пиннаг хоёр тоглолтын нийлбэр дүн 4:0-ээр буулган авч, дэлхийн аварга боллоо. Тоглогчид эхний удаад “PlayStation” дээр хүч үзсэн бол удаад нь “Xbox” дээр ур чадвараа шалгасан юм.

Энэ тэмцээнд оролцох урьдчилсан шатанд 20 гаруй сая хүн өрсөлдөж, тэднээс шалгарсан шилдэг 32 тоглогч Лондонд ур чадвараа сорьсон юм.

The 2018 #FIFAeWorldCup Champion: @Msdossary7 ?? ? pic.twitter.com/YXYPK2h5Rz

— #FIFAeWorldCup (@FIFAeWorldCup) August 4, 2018

Хөлбөмбөгийн ДАШТ-ий дүрэмтэй тун төстэй. Оролцогчдоос допингийн шинжилгээ авч, мөн тэд өдөрт 10 гаруй цаг бэлтгэл хийж байсан аж. Хэсгийн шат, шөвгийн 16, шөвгийн найм, хагас шигшээ болон шигшээ гэсэн журмаар ялагч тодорсон.

Уг тэмцээн 2004 оноос хойш зохион байгуулагдаж буй ч 2016 онд шагналын сан эрс нэмэгдэж, олон улсын анхааралд өртсөн юм.

Тус тэмцээнийг “Sky Sports” суваг цахим хуудсаараа шууд дамжуулж, “02 Arena”-д 3500 гаруй үзэгч аваргын төлөөх тоглолтыг шууд сонирхсон аж.

History.

Congrats, @Msdossary7! #FIFAeWorldCup pic.twitter.com/4K2lX73JJg

— #FIFAeWorldCup (@FIFAeWorldCup) August 4, 2018

М.Алдоссари 250 мянган ам.долларын урамшуулал хүртсэн бол бельги эр Пинна 50 мянган ам.долларын шагнал авчээ.

Сонирхуулахад, М.Алдоссари тус тэмцээнд түрүүлж буй анхны араб эр биш. Түүнээс өмнө 2015 онд Саудын Арабын Абдулазиз Алшехри түрүүлж байв.

М.Алдоссари мөнгөн урамшууллаас гадна энэ оны сүүлээр Лондонд болох Олон улсын хөлбөмбөгийн холбооны шилдгүүдийг шалгаруулах ёслолд оролцох эрхтэй болсон билээ.