АНУ-ын Лос-Анжелес хотод 2019 ба 2021 онд Дэлхийн хотуудын спортын наадмыг зохион байгуулахаар болжээ. 

Унгарын Будапешт хотод болсон Олон улсын спортын холбоодын хурлаар ийм шийдвэр гаргалаа. Энэ эрхийн төлөө дөрвөн хот нэр дэвшсэн ч 2028 оны зуны олимпийг эх орондоо хүлээн авахаар болсон Лос Анжелес хот ялалт байгуулсан юм.

Анх удаа зохион байгуулагдаж буй тус наадамд хотын спортын долоон төрлөөр 700 гаруй тамирчин хурд, хүчээ сорих аж.

Хотын спортын наадмын хөтөлбөрт 3х3 сагсан бөмбөг, BMX спорт дугуйн тэмцээн, спорт авиралт, брейк бүжиг, скейтборд, дугуйт тэшүүр зэрэг спортын төрлүүд багтсан юм.

Одоогийн байдлаар яг хэзээ энэ наадам болох нь тодорхойгүй байгаа ч 2019 оны есдүгээр сард болно гэж таамаглаж байгаа. Түүнчлэн тус наадам 5-7 хоногийн турш үргэлжлэх төлөвлөгөөтэй байгаа аж.