Манай улсад зохион байгуулагдаж буй жюү жицүгийн Азийн АШТ-ий эхний өдөр монголчууд нэг алт, хос хүрэл медаль хүртжээ. Файтинг төрлийн эмэгтэйчүүдийн +70 кг-д Б.Хулан алт, файтинг төрлийн эмэгтэйчүүдийн 57 кг-д Э.Түвшинзаяа, дуо системийн эмэгтэйчүүдийн төрөлд Э.Түвшинзаяа, Д.Монголжингоо нар хүрэл медаль хүртсэн юм.

Энэ удаагийн тэмцээнд 28 орны 400 гаруй тамирчин оролцож байгаа юм. Манай улс зохион байгуулагчийн давуу эрхээ эдэлж, нэг жинд дөрвөн тамирчинтай өрсөлдөж буй. Насанд хүрэгчдийн ангилалд өрсөлдөж байгаа 331 тамирчнаас 62, өсвөрийн 77 тамирчнаас 47 нь Монголын тамирчид байх аж.